1417. Juni 10. Oppeln

Wir Richtleute, Steffke Strol von Obrowicz gesessin czu Sedlicz, Przeczlaw von Kusmalcz, des Newenhauses, vnd Jaschke von Camen, des aldenhauses czu Opul heuptmanne, thun kunth allen dy desen briff sehen adir horen lesen, uffintlich vnd bekennen, das vor vns komen seyn dy erbarn knechte Jacusch Zdzwy mit seyner muter schultissinne czu Wanwaln an eyme, vnd Paschke Goschken son von Wanwaln am andern teyle, mit wolbedochtim mute, vnbetwungen vnd mit rate ir beyder frunden, vnd habin vns an beyden teylen mit fleyse gebeten, das wir sy gutlichen entschichten vnd vorrichten vmbe alle bruche, dy czwischen en weren vmbe dy schultissey czu Wanwaln, vnd nemlichen vmbe drithalbe huffe erbis dy dorczu gehoren, dorvmbe sy lange geteydinget hatten, vnd seyn des an vns mechticlich gegangin, was wir czwischen en geteydingten vnd machten, das habin sy vns gelobt vnd vorburgt, stete czu haldin vnd nymmir dowedir seyn nw vnd ewiglich. Auch gelobten sy an beyden teylen vor ire alle frunde, das sy auch nymmirme dorvmbe reden sullen, sundir dy vorrichtunge vnd beredunge, dy wir czwischen en machten, gancz vnd stete nw vnd ewig haldin. Dorvmbe noch ir beyder vorlegunge, rede vnd wedirrede, dy czwischen den vorgenanten Jacusch vnd Paschken vor vns geschaen sint, noch vnser vornumft dy vns got gegebin hat, sprechen wir vor eyn gleich, das Jacusch Zdzwy gebin sal dem Paschke newn marck groschen behemischir muncze polnischer czal, nw uff den nehesten czukumftigen sand Michils tag fumfthalbe marck, vnd als nw von heute ubir eyn ior dy andirn fumfthalbe marck, vnd sal das gelt czu Opul nedirlegen vnd gebin, wo vnd weme is der egenante Paschke befeilt adir heyset, vnd sprechen den vorgenanten Jacusch Zdzwy, seyne muter, brüdere, vnd ire eliche nochkomlinge queyt loz vnd ledig von dem egenanten Paschken vnd seynen allen frunden nw vnd ewiglich, Vnd welch teyl dy vorrichtunge stroffen welde adir ymmir doweder reden, das sal vorvallen fumfczig marck groschen der obngeschrebin muncze vnd czal, vns vnd vnsern rechten nochkomlingen, vnd dovor habin gloht dy woltochtigen Hannus Hawgwicz von Newodnyk, vnd Hannus von der Lancka, vnd des burgen seyn an des Paschken teyle, Vnd Henrich Fedler vnd Jürge Dobrer metepurger czu Opol, an Jacusch Zdzwen teyle. Des czu orkunde vnd bekentnisse habin wir vnsere Ingesigille, mit vnser wissintschaft an desen briff lassin hangin, der gegebin ist czu Opol an des heyligen leychnams tage noch cristi geburt firczenhundirt ior vnd in dem sebenczenden iore.

An der besonders schon geschriebenen Urkunde hangen die drei kleinen runden, sehr undeutlichen Siegel.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 1, Urkunden des Klosters Czarnowanz. Hrsg von dr W. Wattenbach, Breslau 1857.